Sa Pagsikat ng ARAW..

     Problema, problema, problema. Pamilyar tayong lahat sa salitang iyan. Araw-araw mo ba namang harapin hindi ba? Lahat raw ng tao ay may problema. Lahat ay may iniisip, lahat ay may dinaramdam. Ngunit bakit may mga taong masaya, may mga tao rin namang problemado at aburido sa buhay? Simple lang ang kasagutan diyan, ang pagharap sa mga problema ay nasa tao rin. Nasa sa iyo kung paano mo dadalhin ang iyong mga suliranin at kung paano mo ipagpapatuloy ang iyong buhay sa kabila ng patuloy nilang pagdating.

      Upang maging matibay raw sa pagharap ng mga suliranin, kailangan raw ang pagkakaroon ng ugaling "positibo" sa lahat ng bagay. Ultimo bato kailangan mong isipin na mapapagalaw mo, ganyan ang dapat nating maging pananaw sa buhay. Aminin natin, hindi madali ang mga ito. Iyong simpleng hindi ka nga sinipot ng ka-date mo, halos bagsakan ka na ng langit at lupa hindi ba? Paano pa kaya ang mabibigat pang mga problema. Mahirap nga pero ito ang katotohanan. Pilit mo mang takasan sila, susundan at susundan ka pa rin ng mga iyan. Likas na sa pagiging tao ang pagkakaroon ng mga suliranin. Harapin mo sila, huwag takbuhan.

      Patuloy na mabuhay. Ngumiti sa araw-araw. Sigurado ko na sa paglipas ng araw, may bubulong na lang sa iyo na "Ito na ang mga sagot sa problema mo". Hindi ko naman ibig sabihin na kailangan mo lang maghintay at tumunganga hanggang sa makita mo ang solusyon. Gumawa ka rin ng mga paraan. Samahan ng kilos at pagdadasal. Iwasan ang pag-inom at pagbibisyo sa tuwing may hinaharap na mabigat na bagay. Sinasabi ko sa iyo, lalo mo lang binibigyan ns sakit ang ulo mo. Ika nga nila, paano mo malalaman ang tunay na kahulugan ng liwanag kung hindi mo naman naranasan ang kadiliman? Paano mo malalaman ang kahulugan ng pag-asa kung kahit minsan ay hindi mo naranasang mahirapan at lumuha? "Eh ano kumg marami kang problema ngayon, malay mo bukas may solusyon na ang mga ito?" Sabihin mo iyan sa iyong sarili tuwing makakaramdam ng kawalan ng pag-asa. Hindi problema ang binibigay ng Maykapal sa atin kung hindi mga "pagsubok" na magpapatibay ng ating pagkatao. Mga pagsubok na magiging daan upang maging malapit tayo sa KANYA. Sa tuwing sisikat ang araw , hudyat nito'y panibagong araw at PAG-ASA.